Raureif

Im Winta waun da Vorwind waht

der d'feichte Köit'n einazaht,

und d'Bam mit Raureif üwaziagt

dass d'Äst bis auf'n Bod'n biagt.

Daun muaß ma aufi auf die Heh'

knietiaf durch'n frisch'n Schnee,

in oilla Fria waun d'Sun aufgeht

wäu do a Märchenwöd entsteht.

Oillas glitzat und oillas stroit

waun da Schneestaub owafoit,

wia a Brautschleia so fein,

ma moant, es muaß a Zauba sein.

Und mit a weng a Fantasie

moat ma daun fost irgandwie,

de Bam sand oillas Fab'lwes'n

do siacht ma Hex'n auf'n Bes'n.

Oda goar den Rübezahl

der Aunblick is auf jed'n Fall,

wert dass ma a bissal staunt

d'Natur de kau scho oillahaund.

Mundartgedicht von Gottfried Preuler